Gengið upp að Háafossi

Háifoss í Holtsá. Mynd tekin með dróna. Efri fossinn sem sést einnig á þessari mynd er nafnlaus og kemur úr þverkvísl í Holtsá við Klofninga. Það er raunar hægt að sjá báða fossana í einu frá gönguleiðinni ef göngufólk hefur augun hjá sér.

Háifoss má teljast tilkomumesti fossinn á Fellsmerkursvæðinu og einfaldast er e.t.v. að ganga að honum að vestan. Gangan hefst þá áður en farið er austur yfir Holtsá á brúnni. Þá er gengið er upp með Holtsá á hægri hönd.

*Kort sem sýnir gönguleiðina að Háafossi í Holtsá að vestan. Pílan bendir á fossinn og frá staðnum á gönguleiðinni sem fossinn sést einna best.*

Það þarf að komast yfir smálæki sem stundum eru þurrir en eiga upptök sín í Þurragili, Selgili og Brókargili. Af þessum þá er það helst lækurinn úr Selgili sem má treysta á að hafi eitthvað vatn en hinir eru oft þurrir. Í eðlilegu tíðarfari ætti að vera auðvelt að stikla þessa læki.

Einfaldast er að fylgja nokkurn veginn vegarslóða sem liggur þarna áleiðis inn á Fellsheiðina en ekki sleppa samt alveg að kíkja ofan í Selgilið sem er þar á vinstri hönd. Það væri raunar líka tilefni fyrir annan göngutúr inn Selgilið en þar eru t.d. nokkrir skemmtilegir litlir fossar.

Sá hluti gönguleiðarinnar sem er á vegslóðanum er einnig upplagður sem hjólaleið.

*Foss sem sést til ofan í Selgili frá gönguleiðinni ef kíkt er á réttum stað. Hrosshamrar á bakvið. Ef gengið er inn Selgilið sjálft er hægt að komast að þessum fossi.*

Vegarslóðinn var lagður fyrir einhverjum áratugum og væntanlega hugsaður til að auðvelda það að koma sauðfé í sumarhaga upp á Fellsheiði en hún er annars ekki notuð að ráði fyrir beit lengur. Vegarslóðanum er fylgt áfram að mestu þangað til hann fer að hlykkjast á æfintýralegan hátt áleiðis upp á Fellsheiðina.

*Hinir sérkennilegu hlykkir sem liggja áleiðis upp á Fellsheiði – en þegar farið er upp að Háafossi er sem sagt ekki farið upp þessa hlykki heldur gengið að ánni þar sem þeir hefjast.*

Áður en í mestu hlykkina er komið er slóðinn yfirgefinn og genguð til hægri í austurátt, að Holtsánni. Þar komum við nokkurn veginn að fossinum sem sést þokkalega þarna úr vesturátt. Gengið er norðan í lítilli hæð merkt 393 m á kortum og þá sést fossinn örlítið ofar í ánni.

*Háifoss eins og hann sést frá þeirri gönguleið sem er lýst hér. Þessi mynd er tekin með síma þannig að hér sést nokkurn veginn það sjónarhorn sem blasir við í göngunni.*

Svo er haldið niður með gljúfrinu og augum skotrað á fossinn sem oftast.

*Háifoss í Holtsá, eins og hann sést í göngufæri vestan frá*, áður en farið er frá ánni til baka.

Genginn er smá hringur þarna umhverfis 393 m hæðina áður en farið er til baka aftur og ágætt að fylgja vegarslóðanum til baka.

Yfirlit yfir gönguna:
– Göngulengd: 7 km
– Hækkun: 350 m
– Tími: 2-3 klst

Gengið að Háafossi austanmegin

Einnig er hægt að ganga að fossinum að austan og hefst þá gangan í landi Holts, rétt austan við brúna á Holtsá. Ánni er fylgt eftir um Holtsheiði og eftir um 3 km göngu er komið að fossinum. Þarna austan megin fæst raunar jafnvel betra útsýni að fossinum þar sem auðvelt er að komast nær honum en vestan megin.

Þar sem Holtsá fellur þarna á löngum köflum í 100 til 200 metra djúpu þverhníptu gljúfri, þá er hins vegar ekki nokkur leið að komast yfir ána.